Боздиди Франсис Ришард аз КМТ

Душанбе, 23.05.2014. (АМИТ «Ховар»,Фарзона Достонзода).- 22 майи соли равон директори илмии китобхонаи Булаки шаҳри Париж Франсис Ришард ба Китобхонаи миллии Тоҷикистон (КМТ) ташриф оварда, бо кормандони китобхона вохӯрд.
Тавре ки ба АМИТ «Ховар» аз КМТ иттилоъ доданд, Франсис Ришард перомуни нигаҳдошти дастхатҳои Шарқ дар Париж суҳбат ороста афзуд: «Ман ошиқи ин макон шудам ва имрӯз хеле шодам, ки боз маро кормандони китобхона гарму ҷӯшон истиқбол намуданд».
Ёдовар мешавем, ки Франсис Ришард даъфаи чорум аст, ки ба Китобхонаи миллии Тоҷикистон меояд. Ӯ чанд моҳе қабл ду адад китоби нодирро аз китобхонаи шаҳри Порис ба Китобхонаи миллии Тоҷикистон тақдим намуд. Имрӯз Франсис Ришард 120 адад китоби нодирро, ки аз китобхонаи Порис нусхабардорӣ намудааст, ба Китобхонаи миллии Тоҷикистон тақдим намуд. 
Инчунин дар ҷараёни вохӯрӣ Созишномаи ҳамкорӣ миёни Китобхонаи Булаки шаҳри Порис ва Китобхонаи миллии Тоҷикистон ба имзо расид.