Д.Камолиддинов аз мансабаш озод шуд

    Душанбе, 20.05.2014. (АМИТ «Ховар). —  Бо  қарори  Кумитаи  иҷроияи Федератсияи  футболи  Тоҷикистон сармураббии  дастаи  мунтахаби  Тоҷикистон  оид ба  футзал Дамир  Камолиддинов  аз  мансабаш  озод  карда шуд. 
Тавре  ки  аз Федератсияи  футболи  Тоҷикистон  хабар  доданд,  сабаби  истеъфои Дамир  Камолиддинов дар  мусобиқоти  Осиё омад  накардани  дастаи  мунтахаби  кишвар  аст. Хотирнишон  месозем, ки  футболбозони  Тоҷикистон  дар  ин  мусобиқот  дар  гурӯҳи  «А»  қувваозмоӣ  намуда, дар  се  вохӯрӣ  бозиҳоро бо  ҳисоби  0:5, 4:10 ва  1:6 ба  дастаҳои  Кувайт, Ветнам  ва  Ироқ  бохтанд.
Хотирнишон  месозем, ки  Дамир  Камолиддинов  аз  соли  2001 вазифаи  сармураббии  дастаи  мунтахаби  Тоҷикистон  оид ба  футзалро  иҷро  мекард. Дастаи  мунтахаби  Тоҷикистон  бо  роҳбарии  ӯ дар 8  даври ниҳоии  мусобиқоти  Осиё  иштирок  карда,  дар  26  вохӯрӣ  10  ғалаба ба  даст  оварда, як  бозиро  мусовӣ  карда,  дар  15  вохӯрӣ  мағлуб  шуд. Тафовути тубҳо  баробари 92 – 152  мебошад.