Дарёфти ҷасади Мадинаи гумшуда аз ҳоҷатхона

Душанбе, 22.05.2014. (АМИТ «Ховар, Мавҷуда Анварӣ). — Ҷасади Мадина Саидқосимова, сокини 24-солаи шаҳри Душанбе аз дохили ҳоҷатхонаи хонаашон ёфт гардид. Дар ин бора ба АМИТ «Ховар» сардори маркази матбуоти Кумитаи ҳолатҳои фавқулода ва мудофиаи шаҳрвандии Ҷумҳурии Тоҷикистон Ориф Нозимов хабар дод. Манбаъ иттилоъ дод, ки шаби 21-уми май соати 20:20 дақиқа аз кормандони ШКД ноҳияи Исмоили Сомонӣ хабар расид, ки ҷасади Мадина дар дохили ҳоҷатхона пайдо гардидааст. Бо гирифтани маълумоти фаврӣ дастаи зудамали наҷотдиҳӣ иборат аз 9 нафар ба ҷойи ҳодиса сафарбар гардида, ҷасади Мадинаро аз даруни ҳоҷатхонаи хонаашон, ки чуқуриаш 7 метрро ташкил медод, бароварда, ба мақомоти дахлдори ноҳияи Исмоили Сомонӣ супорида шуд.Мадина Саидқосимова, сокини маҳаллаи “Нагорний”-и шаҳри Душанбе 30 апрели соли ҷорӣ бедарак гардида буд ва ҳамаи наздикону пайвандонаш дар якҷоягӣ бо сохторҳои дахлдор ба кофтуков машғул буданд.