Форуми соҳибкории Тоҷикистону Баҳрайн

Душанбе, 29.04.2014. (АМИТ «Ховар», Бекназари Абӯбакр). — 28 майи соли равон дар доираи сафари расмии Президенти Ҷумҳурии Тоҷикистон Эмомалӣ Раҳмон ба Шоҳигарии Баҳрайн Форуми соҳибкории Тоҷикистону Баҳрайн баргузор гардид, ки дар кори он Президенти мамлакат Эмомалӣ Раҳмон иштирок ва баромад намуда, шахсан фазои сиёсӣ ва ҳуқуқии соҳибкорию сармоягузории Тоҷикистонро ба соҳибкорони бонуфузи Баҳрайн муаррифӣ кард ва онҳоро ба ташкил ва густариши ҳамкорие. ки барои ҳарду ҷониб судбахш аст, даъват намуд. Инчунин дар кори Форум роҳбарони як зумра вазорату идораҳо ва доираҳои соҳибкории ҳарду мамлакат иштирок намуданд.
Аз Кумитаи давлатии сармоягузорӣ ва амволи давлатии ҶТ ба АМИТ «Ховар» иттилоъ доданд, ки мақсад аз Форум баррасӣ намудани имкониятҳои мавҷудаи тиҷоратию сармояузорӣ, тақвият бахшидани робитаҳои иқтисодии байни Тоҷикистон ва Шоҳигарии Баҳрайн тавассути ҷалби сармоя мебошад. 
Дар ҳамоиш фазои сармоягузории Тоҷикистон, имкониятҳои мавҷудаи сармоягузорӣ ва дурнамои он муаррифӣ карда шуданд. Аз ҷумла зикр гардид, ки тайи чанд соли охир тавассути амалӣ намудани ислоҳоти ҷиддӣ барои соҳибкорону сармоягузорони хориҷӣ дар Тоҷикистон беш аз 40 имтиёз муайян шудааст.
Раиси Кумитаи давлатии сармоягузорӣ ва идораи аволи давлатии Ҷумҳурии Тоҷикистон Қодири Косим оид ба афзалиятҳои сармоягузорӣ дар Тоҷикистон, аз ҷумла қонунгузорӣ дар самти рушди бахши хусусӣ, ҷойгиршавии ҷуғрофию иқлими муносиб, дастрасии боигариҳои табиию канданиҳои фоиданок ва қувваи кории арзону соҳибтахассус маърӯза намуд.