Футболбозони ДМИТ- дар ҷои аввал

Душанбе, 22.05.2014. (АМИТ «Ховар», Раъно Нусратуллозода).- Бо ташаббуси бахши кор бо ҷавонон, варзиш ва сайёҳии ноҳияи Сино ва дар доираи «Соли 2014- соли оммавияти футбол» дастаи варзишии футболбозони Донишкадаи молия ва иқтисоди Тоҷикистон (ДМИТ) аз 25-и апрел то 15-уми майи соли 2014 дар мусобиқаи варзишӣ аз намуди футболи хурд, ки бахшида ба 90-солагии шаҳри Душанбе ва Рӯзи ҷавонон барои дарёфти «Ҷоми раиси ноҳия» миёни донишҷӯёни муассисаҳои олии таълимӣ, коллеҷу литсейҳои касбӣ ва шаҳраку маҳаллаҳои ҳудуди ноҳияи Синои шаҳри Душанбе дар байни 14 даста доир гардид, фаъолона иштирок намуд. Дар даври ниҳоӣ аъзои дастаи Донишкадаи молия ва иқтисод бо футболбозони маҳаллаи Чортеппа қувваозмоӣ намуда, бо ҳисоби 2-1 ғолиб омада, сазовори ҷои аввал шуданд.
Тавре ки котиби матбуоти донишкадаи молия ва иқтисоди Тоҷикистон Машҳура Абдуллоева иттилоъ дод, дар маросими ҷоизасупорӣ Маликшо Неъматов, раиси Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон, ректори ДМИТ Ашӯрбой Солиев, президенти Федератсияи футболи шаҳри Душанбе Дилшод Ҷӯраев, мудири бахши ҷавонон, варзиш ва сайёҳии ноҳияи Сино А. Ғаффоров иштирок ва суханронӣ намуданд. 
Маликшо Неъматов ба дастаи ғолиб Ҷоми раиси ноҳияи Синоро дар вазъияти тантанавӣ супорид.
Дастаи дигари донишкада сазовори ҷои чорум шуда, бо Ифтихорномаи Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон мукофотонида шуд.