Хадамот бо 5755 нафар вохӯрд

Душанбе, 29.05.2014. (АМИТ «Ховар», Лайло Тоирӣ).- Кормандони Раёсати Хадамоти муҳоҷират аз 28 март то 21 майи соли равон дар шаҳри Душанбе ва шаҳру навоҳии тобеи ҷумҳурӣ 33 вохӯрӣ бо иштироки 5755 нафар фаъол ва сокини шаҳри Душанбе ва навоҳии тобеъ гузарониданд.
 Тавре ки аз Раёсати Хадамоти муҳоҷират иттилоъ доданд, дар доираи вохӯриҳо, гурӯҳи кории Раёсати Хадамоти муҳоҷират ба саволҳои гуногуни сокинони шаҳри Душанбе ва шаҳру ноҳияҳои тобеи ҷумҳурӣ вобаста ба муҳоҷирати меҳнатӣ ҷавобҳои мушаххас доданд. Аҳолии ин ноҳияҳо бештар оид ба гирифтани иҷозаи кор, гирифтани патент, сертификати забондонӣ, суғуртакунонӣ, сабабҳои ихроҷи муҳоҷирони меҳнатӣ ва дигар мушкилиҳо савол медоданд.
 Бояд зикр намуд, ки дар аксарияти вохӯриҳо кормандони дастгоҳи марказии Хадамоти муҳоҷират, Созмони Байналмилалии муҳоҷират ва кормандони шуъбаҳои агентии шуғли аҳолӣ ва муҳоҷират дар шаҳри Душанбе ва шаҳру ноҳияҳои тобеи ҷумҳурӣ низ сухан гуфтанд. 
 Кормандони Раёсати Хадамоти муҳоҷират тасмим гирифтаанд, ки минбаъд ҳам дар самти бурдани корҳои фаҳмондадиҳӣ байни муҳоҷирони меҳнатӣ, аъзои оилаи онҳо дар шаҳри Душанбе ва шаҳру ноҳияҳои тобеи ҷумҳурӣ вохӯриҳоро идома диҳанд.