Иқдоми АМВТ бахшида ба Рӯзи ҷавонон

Душанбе, 24.05.2014 (АМИТ «Ховар», Фарзонаи Давлат).- Дирӯз дар Кохи «Ваҳдат» бахшида ба Рӯзи ҷавонони Тоҷикистон Ассотсиатсияи миллии волонтёрони Тоҷикистон (АМВТ) дар якҷоягӣ бо Ассотсиатсияи Ҳелветас оид ба танзими оила аз тариқи саволу ҷавоб, ки қоидаву низом ва раванди солими хамзистиву оиладорӣ, муҳтавои саволномаҳоро ташкил медод, иқдом доир намуд. Дар чорабинӣ ба ширкаткунандагон дастурамалҳое, ки дорои мавзуъҳои  ҳуқуқӣ ва ахлоқӣ буданд, дастрас шуданд.
Ҳадаф аз баргузории чорабинӣ- ин шинохти воқеии арзишҳои аслии оиладорӣ, доштани мавқеи устувор, вусъати назар ва эҳсоси масъулияти бештар дар робита ба интихоби ҳамсар ва ташкили як хонаводаи хуб ва ҳамдигарфаҳмӣ дар масоили рӯзмарраи зиндагӣ буд.
Ёдрас мешавем, ки масъулини Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Ассотсиатсияи миллии волонтёрони Тоҷикистон роҷеъ ба фаъолияти ҳаракати волонтёрӣ, ҳуқуқу манфиат ва уҳдадориҳои волонтёрон суҳбати озод бо фаъолон ва ҷавонони шаҳри Қурғонтеппа, Кӯлоб ва минтақаи Рашт доир намуданд.