КҲФ аз эҳтимоли сар задани офати табиӣ ҳушдор медиҳад
Душанбе, 22.05.2014. (АМИТ «Ховар, Мавҷуда Анварӣ). — Кумитаи ҳолатҳои фавқулодаи Тоҷикистон аз эҳтимоли сар задани офатҳои нави табиӣ дар кишвар ҳушдор додааст. Дар ин бора ба АМИТ «Ховар» сардори маркази матбуоти Кумитаи ҳолатҳои фавқулода ва мудофиаи шаҳрвандии Ҷумҳурии Тоҷикистон Ориф Нозимов хабар дод. Кумита дар такя ба иттилои маркази обуҳавошиносии кишвар таъкид намудааст, ки имрӯз, 22 май дар ҷумҳурӣ ҳавои ноустувор боқӣ монда, шабона боришоти сахт, дар баъзе минтақаҳо раъду барқ ва эҳтимоли фаромадани сел мавҷуд аст. Ориф Нозимов аз шаҳрвандон ва меҳмони кишвар даъват кард, ки аз сафар аз тариқи роҳҳои монеадор ва аз шикор дар кӯҳҳо худдорӣ кунанд. Инчунин аз шаҳрвандон хоҳиш мешавад, ки наздикону пайвандони хешро ба назорат гирифта, ба ин васила барои пешгирии ҳодисаҳои нохуш мусоидат намоянд. Дар ин рӯз ҳайати шахсии ситодҳо оид ба ҳолатҳои фавқулода ва мудофиаи шаҳрвандӣ дар шаҳру вилоятҳои кишвар ба ҳолати омодабош гузаронида шудаанд.