Конфронси илмӣ бахшида ба Рӯзи Ғалаба

 
Душанбе, 08.05.2014. (АМИТ «Ховар», Раъно Нусратуллозода).-Ба муносибати 69-умин солгарди Иди Ғалаба дирӯз  дар Донишгоҳи давлатии Хуҷанд ба номи академик Бобоҷон Ғафуров конфронси илмӣ баргузор гардид.
Тавре ки котиби матбуоти Донишгоҳ Маъмури Юсуфзод иттилоъ дод, дар нишаст муовини ректори донишгоҳ Абдулфаттоҳ Раҳимов афзуд, ки 9-уми майи соли 1945 дар хотири мардуми сулҳпарвару озодихоҳи тоҷик ҳамчун натиҷаи корнамоиҳои беназир ҳам дар ҷабҳаи набард ва ҳам дар ақибгоҳ арзёбӣ мегардад, зеро хурду бузурги кишвар ба хотири ҳифзи Ватан ва таъмини ҳарчи зудтари пирӯзӣ дар ҷанг қаҳрамониҳои бемислу монандеро нишон доданд. 
Дар ҷамъомад зикр гардид, ки он қаҳрамонӣ, шуҷоат, диловарӣ ва садоқате, ки фиристодагони Тоҷикистон, аз ҷумла хуҷандиён дар қатори миллионҳо нафар намояндагони халқу миллатҳои гуногуни Иттиҳоди Шӯравӣ дар ҷабҳаҳои Ҷанги Бузурги Ватанӣ нишон додаанд, намунаи ватандорӣ ва дарси олии мардонагӣ буда, дар китоби таърихи Ватан бо хатҳои заррин сабт шудааст ва насли ҷавони имрӯза вақте ки онҳоро варақгардон мекунад, дар мисоли садоқатмандию ватанпарастии бобоён ва падарони шӯҳратманд дарси садоқату вафодорӣ меомӯзад.
Дар анҷоми конфронс ба як гурӯҳ собиқадорони ҷангу меҳнат туҳфаҳои хотиравӣ тақдим гардиданд.