Маҳфили шеъри шоири шуҳратёри тоҷик- Бозор Собир

Душанбе, 30.05.2014. (АМИТ «Ховар, Мавҷуда Анварӣ). -Имрӯз дар толори Филармонияи халқии ноҳияи Файзобод ба номи Нигина Рауфова маҳфили шеъри шоири шуҳратёри тоҷик, барандаи Ҷоизаи Рӯдакӣ, дорандаи Ордени «Ситораи Президент» устоди сухан Бозор Собир баргузор мегардад. 
Чорабинии фарҳангӣ дар доираи омодагиҳо ба ҷашни Ваҳдати миллӣ ва 20-солагии Конститутсия (Сарқонун)-и Ҷумҳурии Тоҷикистон гузаронида мешавад. 
Интизор меравад, ки дар чорабинӣ ҳунармандон Саидқул Билолов, Муҳаррама Шарифова ва дигарон иштирок карда, аз осори пурғановати Бозор Собир сурудҳо сароянд. 
Бозор Собир аз шоирони маъруфи адабиёти муосири тоҷик маҳсуб меёбад. «Аз гули хор то симхор», «Оташбарг», «Бо чамидан бо чашидан», «Чашми сафедор», «Офтобниҳол» аз гулчини ашъори нотакрори шоири тоҷик аст, ки Бозор Собирро машҳур гардонидаанд.