Масоили бахши истеҳсоли гандум дар шароити тағйири иқлим

  Душанбе, 24.05.2014. (АМИТ «Ховар, Екатерина  Пасторова). —  Дар  ҳошияи  татбиқи лоиҳаи  муштараки Ҳукумати  ҶТ,  USAID  ва  Барномаи  рушди  СММ  аз 29  то  30  май  дар  шаҳри  Душанбе  Конфронси  илмию  амалии «Вазъият  ва масоили  бахши  истеҳсоли  гандум  дар  шароити  тағйири  иқлим» баргузор  мегардад.  Дар  конфронс  баробари намояндагони  созмонҳои  мухталифи  миллию  байналмилалӣ,  вакилони ҷомеаи  шаҳрвандӣ ва созмонҳои тиҷоратӣ, муҳаққиқон  ва  иқлимшиносон   иштирок  менамоянд. Мушовири Лоиҳаи равобит  бо  аҳли  ҷамъият  Нигора  Остонова  дар  ин  бора  хабар  дод.
Ҳадафи  асосии  конфронс  шиносоӣ бо  вазъияти бахши истеҳсоли  гандум,  омӯзиши   таҷрибаи   Қазоқистон  ва  кишварҳои  Осиёи  Марказӣ,  ҳамчунин тарҳрезии  тадбирҳои  стратегӣ барои  ҳалли  проблемаҳои   рушди  устувори  истеҳсоли  гандум  дар  шароити  тағйир  ёфтани  иқлим  ва  бехатарии маводи  ғизоӣ дар Осиёи  Марказӣ  мебошад.
Дар  ҷараёни  конфронс проблемаҳои  асосии   рушди  бозори  ғалла  мавриди  баррасӣ  қарор  гирифта,  натиҷаи  ҳосилнокӣ   дар  соли  2013 ва кишти  ғалла дар  соли  2014,  ҳамчунин  проблемаҳои  асосии  пешбинии  вазъи  обу ҳаво ва таъсири  тағйири  иқлим  ба  бахши  истеҳсоли  гандум   дар  минтақаи Осиёи  Марказӣ  муҳокима  мешаванд.