Мизи мудаввар бахшида ба зодрӯзи Абдураҳмони Ҷомӣ
Душанбе, 14.05.2014. (АМИТ «Ховар, Анна Мошенко). – Дар ҳошияи Ҳафтаи филология 13 май дар Донишгоҳи славянии Русияю Тоҷикистон бахшида ба 600 – солагии зодрӯзи классики адабиёти форсу тоҷик Абдураҳмони Ҷомӣ мизи мудаввар баргузор гардид.Декани факултаи филология Рустам Салимов зимни сарсуханаш зикр намуд, ки Абдураҳмони Ҷомӣ чун Абулқосим Фирдавсӣ, Абӯабдулло Рӯдакӣ, Умари Хайём, Ҳофиз ва Саъдии Шерозӣ аз ҷумлаи шоирони бузургест, ки онҳоро метавон ба таври ҳаққонӣ шоирони тамоми башарият донист. Вақтҳои охир дар кишвар ба адабиёти классикӣ таваҷҷуҳи хосса зоҳир мешавад, илова намуд Рустам Салимов.Сипас омӯзгори донишгоҳ Леонид Чигрин дар мавзӯи «Абдураҳмони Ҷомӣ — сарвари маънавии илму адабиёти Мовароуннаҳр ва Афғонистон дар қарни ХУ» маърӯза кард. «Ҷомӣ шогирдони зиёде дошт, ки Алишер Навоии бузург низ аз ҷумлаи онҳост. Меъморон, олимон, нависандагони бисёр кишварҳои дигар меҳмони ӯ мешуданд. Абдураҳмони Ҷомӣ муборизи зидди беадолатии мансабдорон ва ҷонибдори коҳиш додани андозҳои мардуми оддӣ буд», гуфт маърӯзачӣ.