Мулоқот бо хатмкунандагон дар Суғд

Душанбе, 29.05.2014. (АМИТ «Ховар», Лайло Тоирӣ).- Ба наздикӣ дар қасри ҷавонони ба номи Лоиқ Шералӣ мулоқоти сардорони Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ва Сарраёсати Агентии шуғли аҳолӣ бо хатмкунандагони мактабҳои таҳсилоти миёнаи умумӣ ва мактабҳои хусусию гимназияҳои шаҳри Хуҷанд доир гардид.
Дар мулоқот зиёда аз 600 нафар хатмкунанда иштирок намуд.
Сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ба ҷавонон доир ба сиёсати давлатӣ вобаста ба муҳоҷират, вазифаю ваколатҳои Раёсат, вазъи имрӯза ва дурнамои муҳоҷирати меҳнатӣ, қоидаҳои муҳоҷирати бехатар ва ҳамкории Раёсат бо дигар ташкилоту мақомот маълумоти муфассал дод.
Зимни саволу ҷавоб хатмкунандагон бештар ба масъалаҳои ҳифзи ҳуқуқу озодиҳои муҳоҷирон, аз ҷумла муҳоҷирони меҳнатӣ, вазъи бо кор таъмин намудани онҳо дар хориҷа, аҳамияти суғуртакунонӣ, қоидаҳои будубош ва таҳсил дар давлатҳои дигар, муҳоҷирати бехатар ва дигар масъалаҳои вобаста ба муҳоҷирати меҳнатӣ мароқ зоҳир намуданд. 
Дар ин бора ба АМИТ «Ховар» аз Раёсати хадамоти муҳоҷират  дар вилояти Суғд хабар доданд.