Мулоқоти М. Ҷабборӣ бо зарардидагони деҳоти Зайнабободи Рӯдакӣ

 
Душанбе, 16.05.2014 (АМИТ «Ховар», Фарзонаи Давлат).-Имрўз  муовини Сарвазири мамлакат  Марҳабо Ҷабборӣ дар  ноҳияи Рўдакӣ бо вазъи муассисаҳои соҳаи маориф ва ҷараёни иҷрои Қонуни Ҷумҳурии Тоҷикистон  «Дар бораи танзими анъана ва ҷашну маросимҳо дар Тоҷикистон» ва ҳамчунин  аз деҳаи “Комсомол”-и ҷамоати деҳоти Зайнабобод дидан ва бо  сокинони бар асари обхезӣ зарардидаи ин деҳа вохўрӣ кард.
Марҳабо Ҷабборӣ, аз ҷумла дар ноҳия бо  фаъолияти касбомўзони зардўзӣ, гулдўзӣ ва касбҳои мардумӣ дар ҷамоатҳои деҳоти “Россия”, “Чоргултеппа”, мактаб-парваришгоҳи солимгардонии ба номи Бобоҷон Ғафуров, мактаб-интернати ҷумҳуриявӣ барои кўдакони ношунаво  аз наздик шинос шуд.
Муовини Сарвазири Ҷумҳурии Тоҷикистон дар боғи фарҳангии ноҳия бо намояндагони соҳаҳои маориф, фарҳанг, тандурустӣ, ҷавонон, занон ва иттиҳодияҳои динӣ машварати корӣ баргузор намуда, ҷиҳати иҷрои софдилонаи вазифаҳои бар дӯшашон гузошта ёдовар гардид ва даъват ба он намуд, ки ба сокинони аз офати табиӣ зарардидаи ин деҳаҳо ёрии беғаразонаи худро расонанд.