Мулоқоти Ш.Саид бо П.Вергано

Душанбе, 15.05.2014. (АМИТ «Ховар,  Кристина  Эрлих). — 14 май  раиси Палатаи  савдо  ва  саноати  Тоҷикистон  Шариф  Саид  бо мушовири Маркази  байналмилалии тиҷорат аз рӯи  масоили  Созмони  умумиҷаҳонии  савдо  Паоло Вергано   мулоқот  намуд. 
Тавре  ки  аз  ПСС ҶТ  ба  АМИТ «Ховар»  хабар  доданд, Мавзӯи  мулоқот  иборат  аз  масъалаи вориди бозори кишварҳои Иттиҳоди  Аврупо  гардидани  амволи  рақобатпазири  корхонаҳои  Тоҷикистон  буд. 
«Палатаи  мо барои  рушди   робитаҳои  иқтисодии  Тоҷикистон  бо  кишварҳои  ҷаҳон  ҳамеша  кӯшиш  намуда,  ҳайатҳои  соҳибкоронро  ба  ҷумҳурӣ  даъват  менамояд, ҳайатҳои  худро ба  хориҷа  мефиристад, созишномаҳои  ҳамкориро   имзо  менамояд,  ба  доир  намудани   намоишгоҳу  ярмаркаҳо  ва  анҷуманҳои  аҳли  тиҷорат  мусоидат  мекунад», — гуфт  Шариф  Саид. 
«Низоми  умумиҷаҳонии  имтиёзҳо ҳолати  таъсирбахши  Созмони  умумиҷаҳонии  савдо  маҳсуб  ёфта,  ба  кишварҳои тараққиёбанда кӯмак  мекунад, ки худро  дар  байни  кишварҳои  мутараққӣ  бароҳат ҳис  кунанд», —  зикр  намуд Паоло Вергано.
Ҳадафи  низоми умумиҷаҳонии имтиёзҳои Иттиҳоди  Аврупо  иборат  аз дастгирии содироти  амволи  кишварҳои  иқтисодиёташон  тараққиёбанда ба  мамлакатҳои  аъзои Иттиҳоди  Аврупо  ва  мусоидат   ба  ҳамгироии  бозори  ҷаҳон  аст.