Мусодираи беш аз 25 кг маводи нашъадор дар Истаравшан

 Душанбе, 2.05.2014. (АМИТ «Ховар», Муқаддас Темурзода).- Зимни гузаронидани чораҳои фаврӣ-ҷустуҷӯӣ кормандони милитсия дар ҳудуди шаҳри Истравшан бо гумони даст доштан дар гардиши ғайриқонунии маводи нашъадор шаҳрванд Зафар Ҳошимов, соли таваллудаш 1988, сокини шаҳри Конибодомро дастгир намуданд. 
Дар ин бора маркази матбуоти ВКД хабар медиҳад.
Ҳангоми кофтукови шахсӣ аз ӯ 28 адад бастаи селофанпеч бо маводи ҷигарранги бӯи махсус дошта дарёфт ва мусодира гардид. Муайян шуд, ки бастаҳои мазкур аз маводи нашъадори навъи ҳашиш иборат буда, вазни умумиашон 24 кг 862 граммро ташкил дод. «Ҳамчунин аз дастгиршуда 651 грамм маводи сахттаъсири героин дарёфт ва мусодира шуд. Дар маҷмӯъ, маводи нашъадори мусодирашуда 25 кг 513 граммро ташкил медиҳад.
Нисбат ба ҳодисаи мазкур парвандаи ҷиноӣ оғоз гардида, тафтиш идома дорад», — зикр менамояд сарчашма.