Насби 650 камераи мушоҳидавӣ дар кӯчаҳои Хуҷанд

Хуҷанд, 2.05.2014. (АМИТ “Ховар”, Абдуаҳад Шарифзода).-Дар кӯчаҳои маркази вилояти Суғд-шаҳри Хуҷанд 650 камераи мушоҳидавӣ насб мешавад. Тавре ки аз мақомоти иҷроияи давлатии ҳокимияти шаҳр иттилоъ доданд, раиси шаҳри Хуҷанд Раҷаббой Аҳмадзода бо роҳбари Департаменти ширкати НUAWEI дар Ҷумҳурии Тоҷикистон Хенк Шю мулоқот намуд. 
Ба гуфти манбаъ, ширкати мазкур дар якҷоягӣ бо Вазорати корҳои дохилии ҶТ лоиҳаи беҳтар намудани вазъи ҳаракати роҳро амалӣ менамояд.
Алҳол дар марҳилаи аввали лоиҳаи мазкур дар шаҳри Душанбе дар тамоми кӯчаҳои марказӣ ва хиёбонҳои пойтахт барои зери назорат гирифтани ҳаракати воситаҳои нақлиёт ва пиёдагардон камераҳои мушоҳидавӣ, дастгоҳҳои назорати суръати нақлиёт насб шудаанд. Мувофиқ ба амалишавии ин лоиҳа марҳилаи дувуми он бояд, ки дар Хуҷанд роҳандозӣ  шавад. 
Дар ин замина дар доираи лоиҳаи мазкур ширкати НUAWEI тасмим гирифтааст, дар кӯчаҳои маркази вилояти Суғд- Хуҷанд  650 камераи мушоҳидавӣ, 35 чароғаки раҳнамо ва 40 дастгоҳи назорати суръат насб намояд.