Наваскарон ронанда хоҳанд шуд

Душанбе, 23.05.2014. (АМИТ «Ховар», Лайло Тоирӣ).-  Дар  қисми низомии 10040-и Вазорати мудофиа маросими савгандёдкунии наваскарон доир гардид. 
Бино ба иттилои хадамоти матбуоти Вазорати мудофиа, дар ин воҳиди низомӣ меҳмонон аз шаҳру ноҳияҳои дурдасти кишвар гирд омада, дар маросими савгандёдкунии наваскарон иштирок намуданд. 
Пас аз қабули савганди ҳарбӣ наваскарон, ки минбаъд ҳамчун сарбози комилҳуқуқ маҳсуб меёбанд, ба иҷрои вазифаву уҳдадориҳои рӯзмараи хизматии худ оғоз намуданд. Тибқи нақшаи тарҳрезишуда, ҷавонаскарони ротаи дуюми қисми низомии 10040-и Вазорати мудофиа, ки нахуст таълимгирандагони курси ронадагӣ дар соли ҷорӣ мебошанд, дар ин рӯз ба раванди таълим ва омӯзиши техникаҳои мошинӣ шурӯъ карданд. Ба гуфтаи масъулини қисми ҳарбӣ ҳамасола сарбозоне, ки шомили ин қисми низомӣ мегарданд, дар баробари дигар вазифаву уҳдадориҳои хизматӣ ба гирифтани касбу ҳунар ҷалб мешаванд. Дар давоми ду соли хизмати ҳарбӣ эшон на танҳо ба ватан хизмат мекунанд, балки ихтисос ва шаҳодатномаи ронандагӣ низ мегиранд.  Баъд аз адои хизмат онҳо имкон доранд аз рӯи ихтисоси ронандагӣ кор кунанд.