«Нурафшон»-дастаи футболи духтарони донишгоҳ

Душанбе, 15.05.2014. (АМИТ «Ховар», Раъно Нусратуллозода).-Дастаи яккачини футболи духтаронаи Донишгоҳи давлатии Хуҷанд ба номи академик Бобоҷон Ғафуров «Нурафшон» дар сабқати байни муассисаҳои таҳсилоти олӣ, миёна ва махсуси вилоят фаъолона иштирок намуда,  ба гурӯҳи 8 дастаи беҳтарини ин мусобиқот шомил шуда, дар  давоми 10 рӯз бо ин дастаҳо қувваозмоӣ хоҳад намуд.
Тавре ки ҷонишини мудири шуъбаи кор бо ҷавонони Раёсати  донишгоҳ  Эҳсон Наврӯзов  иттилоъ дод, дирӯз бозии навбатии ин даста бо духтарони футболбози коллеҷи омӯзгорӣ сурат гирифта, онҳо бо ҳисоби 2:00 ғолиб баромаданд. Ин мусобиқа дар радифи қарори раиси вилояти Суғд сурат мегирад ва ҷамъбасти он дар рӯзи ҷавонон ба нақша гирифта шудааст.
Ин манбаъ афзуд, ки  дастаи яккачини футболи духтаронаи донишгоҳ «Нурафшон»  бо теъдоди 19 нафар аз ҳисоби донишҷӯдухтарони факултаҳо бо иқдоми  роҳбарияти донишгоҳ созмон дода шуда, минбаъд дар дигар мусобиқоти шаҳриву вилоятӣ фаъолона ширкат меварзад.