Оғози Рӯзҳои фарҳанги маънавии ФР дар ҶТ

Душанбе, 26.05.2014. (АМИТ «Ховар», Кристина Эрлих). — Имрӯз, 26 май,  Рӯзҳои  фарҳанги маънавии Федератсияи  Русия  дар  Ҷумҳурии  Тоҷикистон оғоз  ёфтанд, ки  мақсад  аз  он рушду  таҳкими  минбаъдаи  муносибатҳои фарҳангии Тоҷикистону  Федератсияи  Русия   аст.
Тавре  ки  аз  Вазорати  фарҳанги  ҶТ ба  АМИТ «Ховар»  хабар  доданд,  ҳайати Федератсияи  Русия иборат  аз  ходимони фарҳангу  санъати  ин  кишвар аст. 
Имрӯз  дар  Китобхонаи  миллии  Тоҷикистон  вохӯрии  ҳайати  Русия  бо  роҳбарияти Вазорати  фарҳанги  ҶТ  баргузор гардид. Худи  ҳамин рӯз гурӯҳи  эҷодӣ  дар Театри  давлатии  академии  опера  ва  балети ба  номи  С.Айнӣ  ва Театри давлатии драмаи  русии  ба  номи  В.Маяковский  машқ  карда,  сипас  аз боғи «Ирам»  боздид  менамояд.
Шоми  имрӯз дар  Театри  давлатии академии опера  ва  балети  ба  номи  С.Айнӣ  маросими  ботантанаи   оғози  Рӯзҳои  фарҳанги маънавии Федератсияи  Русия  дар  Ҷумҳурии  Тоҷикистон  ва  муаррифии  намоишгоҳи  суратҳо  таҳти  унвони «Симоҳои  Русия» баргузор  мешавад. 
27  май  дар Театри  давлатии  драмаи  русии ба  номи  Владимир  Маяковский  намоишномаи «Беша»  аз рӯи  асари  Александр  Островский  рӯи  саҳна  оварда  мешавад. Сипас   дар Консерваторияи  миллии Тоҷикистон  ба  номи Т.Сатторов  ҳамоиши эҷодкорон  доир   мегардад. 
28  май иштирокдорони Рӯзҳои фарҳанги  маънавӣ  аз   НБО Норак  дидор намуда,  дар  Қасри  фарҳанги  ин  шаҳр   композитсияи  мусиқию  адабиро аз рӯи  ашъору  сурудҳои  солҳои  ҷанг  манзури ҳаводорони  санъат  мекунанд.
Маросими ботантанаи  анҷоми  Рӯзҳои фарҳангии маънавии    Федератсияи  Русия  дар  Ҷумҳурии  Тоҷикистон  29  май  дар  Театри давлатии  академии  опера  ва  балети ба номи  Садриддин  Айнӣ  баргузор  мегардад.
Қобили  зикр  аст, ки ба  ҳайати  Русия Ҳунарпешаи мардумии  Русия Юрий  Лаптев, Ҳунарпешаи  шоистаи  Русия  Алексей  Кошванетс, ҷоизони  озмунҳои байналмилалӣ  Наталя  Дмитриевская  ва  Вадим Руденко,  дирижёр  Сергей  Кондрашов  ва ғайра  шомиланд