«Расми беҳтарини зиддисӯхторӣ»-озмун

Душанбе, 27.05.2014. (АМИТ «Ховар, Мавҷуда Анварӣ). — Бо мақсади пешгирии ҳодисаҳои сӯхтор, ки бо айби хурдсолону мактаббачагон дар натиҷаи гӯгирдбозию оташбозии онҳо ба вуқӯъ меоянд, озмуни «Расми беҳтарини зиддисӯхторӣ» дар мавзӯи «Аз сӯхтор эҳтиёт бошед!» дар маҷлисгоҳи шуъбаи маорифи ноҳияи Ҳисор бо ибтикори Хадамоти давлатии оташнишонии ноҳия гузаронида шуд.
Дар озмун хонандагони 36 муассисаи таҳсилоти миёнаи умумии ноҳия, ки дар ду даври аввали озмун ғолиб омада буданд, иштирок намуданд. Аз ҷониби иштирокчиёни озмун расмҳои ҷолибу макетҳои гуногун ба маърази ҳакамон ва тамошобинони сершумор пешкаш гардид. Дар баробари расмҳои кашида, инчунин хонандагон ба саволҳои ҳакамон вобаста ба талаботи қоидаҳои бехатарӣ  аз сӯхтор ва тартиби истифодаи воситаҳои аввалиндараҷаи оташнишонӣ ҷавобҳои мукаммал дода, байни худ қувваозмоӣ намуданд.
Ҳайати ҳакамон ҷойи аввалро ба хонандаи синфи 8-уми мактаби №2 Бобоҷон  Исмоилов, ҷойи дуюм ба хонандаи синфи 7-уми мактаби №9 Ширинмоҳи Зафар ва ҷойи сеюмро ба хонандаи синфи 11-уми мактаби №36 Садбарг Бобозода сазовор донистанд.