Роҳандозии коргоҳи коркарди пӯст ва пойафзол дар Хуҷанд

 Хуҷанд, 5.05.2014. (АМИТ “Ховар”,Абдуахад Шарифзода).-Дар шаҳри Хуҷанд бунёди коргоҳи коркарди пӯст ва истеҳсоли пойафзоли ватанӣ ба роҳ монда мешавад. Мувофиқ ба маълумоти хадамоти матбуоти шаҳр раиси шаҳри Хуҷанд Раҷаббой Аҳмадзода бо роҳбарони коргоҳи коркарди пӯсти «Анбар» Равшан Усмонов ва «Тоҷик эко чарм» Комрони Сафар мулоқоти корӣ анҷом дод.
Як масъалаи зимни мулоқот баррасишуда ин ба кор даровардани иқтидорҳои нав буд.  Аз ҷумла, раиси шаҳр ба роҳбарияти ин ду коргоҳ  пешниҳод намуд, ки дар шаҳри Хуҷанд коргоҳи  коркарди пӯст ва истеҳсоли пойафзолро ба роҳ монанд. Дар навбати худ мақомоти иҷроияи ҳокимияти давлатии шаҳри Хуҷанд тамоми шароиту имкониятро барои онон фароҳам хоҳад овард.
Роҳбарони коргоҳҳои номбурда омодагии худро барои амалӣ гаштани ин нақша изҳор карда, илова намуданд, ки маҳсулоти онҳо бо таҷҳизоти муосири аврупоӣ коркарду истеҳсол шуда, ҷавобгӯи тамоми меъёрҳои маҳсулоти баландсифат хоҳад буд.
Дар баробари ин барои 100 нафар ҷойи корӣ ва маоши арзанда таъмин хоҳанд шуд.