Ронандаи аробачаи барқӣ ҳалок шуд

Душанбе, 26.05.2014. (АМИТ «Ховар», Лайло Тоирӣ).-25 майи соли равон ронандаи мошини тамғаи “ВАЗ-21014” Ҳайдаров Ҷонон, истиқоматкунандаи шаҳри Душанбе ҳангоми ҳаракат аз самти шаҳри Қурғонтеппа ба самти ноҳияи Бохтар, дар ҳудуди деҳаи Навкор бехатарии ҳаракат дар роҳро таъмин карда натавониста, ба сабқат баромада, ба аробачаи барқии сечархаи истеҳсоли Чин таҳти идораи ронанда Назаров Сабзаалӣ, сокини шаҳри Қурғонтеппа бархӯрд. 
Тавре ки аз хадамоти матбуотии Вазорати корҳои дохилӣ иттилоъ доданд, дар натиҷа ронандаи аробача Назаров Сабзаалӣ ҷароҳати вазнини ҷисмонӣ бардошта, дар беморхона ба ҳалокат расид.