Сарқонун -шиносномаи миллӣ

Душанбе, 15.05.2014. (АМИТ «Ховар», Мавҷуда Анварӣ). -Дар Академияи Вазорати корҳои дохилӣ бахшида ба «20-солагии Конститутсия (Сарқонун)-и Ҷумҳурии Тоҷикистон» чорабинии фарҳангӣ доир гардид, ки дар он Шоири халқии Тоҷикистон, муаллифи матни Суруди миллӣ Гулназар Келдӣ ва ҳайати устодону курсантони академия иштирок намуданд.
Дар чорабинӣ сардори академияи Ҷӯрахон Зоиров  оид ба моҳият ва аҳамияти тақдирсози ин санади муҳим — Сарқонуни Ҷумҳурии Тоҷикистон маърӯза кард.
Ӯ зикр кард, ки: «Сарқонун — шиносномаи миллат буда, дар он инсон арзиши олӣ маҳсуб меёбад. Маҳз бо шарофати Сарқонун ҷомеаи ҷаҳонӣ давлати моро ҳамчун давлати демократӣ, ҳуқуқбунёд, ягона ва дунявӣ шинохт ва дар он тамоми ҳуқуқу озодиҳои шаҳрванд мустаҳкам  шудаанд».
Шоири халқии Тоҷикистон Гулназар Келдӣ аз таърихи қабули Сарқонун ва матни Суруди миллӣ ёдовар шуд.
Дар чорабинии фарҳангӣ ҳунарманди шинохтаи ҷумҳурӣ Қобилҷон Зарипов аз ашъори Гулназар Келдӣ сурудҳо сароида, курсантони академия бо қироати шеърҳо дар васфи Ватан ва зебоиҳои диёр хотири ҳозиринро шод гардониданд.