Се тифл ба Тоҷикистон баргардонида шуд

 
           Душанбе, 16.05.2014.(АМИТ «Ховар», Марзия Саидзода).-Хадамоти консулии Сафорати Тоҷикистон дар Русия 14 майи соли равон тавассути хатсайри Маскав-Душанбе се шаҳрванди ноболиғи Тоҷикистон-  Оксана Давлатшоева, таваллудаш  23 октябри соли 2013, Умар Исматуллоев, мутаваллид ба 22 марти соли 2013 ва Маҳина  Мирзоёроваро, ки се сол дошта,  15 августи соли 2011 таваллуд шудааст, ба Тоҷикистон фиристод.
      Назар ба иттилои Ҳабибулло Каримов- корманди Хадамоти матбуоти Сафорати Тоҷикистон дар Русия ин тифлон аз зумраи кӯдакони бепарасторе мебошанд, ки волидайнашон аз онҳо даст кашидаанд. Ин кӯдаконро  Хадамоти консулгарии Сафорати Тоҷикистон дар Русия  дар доираи гуфтушунид ва ҳуҷҷатгузории бардавом аз мақомоти марбутаи Русия қабул намуда, ба намояндаи масъули Вазорати корҳои дохилии Точикистон Л. Зокиров супорида,  мавсуф онҳоро ба Тоҷикистон овардааст. Ин тифлон то замони ба Тоҷикистон фиристодан дар  мақомоти парастории ноҳияи Люблино, Хона — кӯдакистони махсуси №6 и шаҳри Маскав ва Хона-кӯдакистони ноҳияи Люберетскии вилояти Маскав нигаҳдорӣ мешуданд.