Ситоди тиббӣ дар ноҳияи Рӯдакӣ

Душанбе, 21.05.2014. (АМИТ «Ховар», Лайло Тоирӣ).- Бино ба иттилои хадамоти матбуоти Вазорати тандурустӣ ва ҳифзи иҷтимоӣ, дар минтақаи аз офати табиӣ зарардидаи ҷамоатҳои Зайнабобод ва Турсунзодаи ноҳияи Рӯдакӣ ситоди тиббии ноҳиявӣ ташкил шуд. Ду нуқтаи таҳлияи тиббӣ ба тариқи шабонарӯзӣ ба мардуми зарардида хизмат мерасонад. 
Аз рӯзи 12 май корҳои хонагардӣ оғоз шудааст, ки то имрӯз 580 хоҷагӣ бо фарогирии 2180 нафар аҳолӣ бо корҳои фаҳмондадиҳӣ нисбат ба пешгирии бемориҳои сироятӣ фаро гирифта шуданд. Аз рӯзи аввал аз ҷониби ситоди ноҳиявӣ корҳои безараргардонӣ дар минтақаҳои осебдида ба роҳ монда шуда, дар якҷоягӣ бо сохторҳои дигар ҷасади ҳайвонҳои хонагӣ нобуд ва безарар гардонида шуданд. Тамоми маводи зарурии тиббӣ дастраси ниёзмандон гардонида шуда, корҳои фаҳмондадиҳӣ дар байни аҳолӣ барои пешгирии бемориҳои сироятӣ то ҳол  идома доранд.