Суғд: Хонандагон дар олимпиадаи Франкфурт иштирок мекунанд

Душанбе, 23.05.2014. (АМИТ «Ховар»,Фарзона Достонзода).-Аз 16 то 17 майи соли ҷорӣ дар шаҳри Душанбе олимпиадаи  ҷумҳуриявӣ  аз фанни забони олмонӣ  гузаронида шуд. Дар он 16 нафар хонандагони муассисаҳои таҳсилоти умумии  ҷумҳурӣ иштирок намуданд.
Тавре ки аз Хадамоти матбуоти раиси вилояти Суғд ба АМИТ «Ховар» иттилоъ доданд, дар олимпиада вилояти Суғдро 8  нафар хонанда  аз мактабҳои хусусии ба номи В. Гётеи шаҳри Хуҷанд, «Сафина»- и ноҳияи Бобоҷон Ғафуров ва мактаби миёнаи № 10-и ноҳияи Бобоҷон Ғафуров намояндагӣ  намуданд.  Дар ҷамъбасти олимпиада  2 нафар — хонандаи  синфи 10-и гимназияи «Сафина» — Муъминҷон Урунов ва  хонандаи синфи 8-и гимназияи  ба номи В.Гёте — Хуршед Набиев сазовори ҷойи аввал  дониста шуданд.
Онҳо  барои иштирок  дар олимпиадаи байналхалқӣ дар шаҳри Франкфурти  давлати Олмон, ки  моҳи августи соли ҷорӣ  баргузор мегардад, роҳхат гирифтанд.
Бояд гуфт, ки ҳамчун туҳфа ба онҳо чиптаи ҳавопаймо ва роҳхат барои истироҳат дар  давлати Олмон аз тарафи ташкилкунандагони олимпиада  ройгон дода шуд.