Суҳбати Шариф Саид бо муовини раиси ПСС Дубай

Душанбе, 07.05.2014. (АМИТ «Ховар, Марҳабои  Азамат). – 6  май  раиси  ПСС Тоҷикистон  Шариф  Саид  дар  шаҳри  Дубайи  Аморати  Муттаҳидаи  Араб  бо  муовини раиси Палатаи  савдо  ва  саноати  Дубай  ҷаноби  Ҳасан ал – Ҳошимӣ  суҳбат  намуд.
Тавре  ки  аз  ПСС  ҶТ  ба  АМИТ «Ховар»  хабар  доданд,  мақсади  асосии мулоқот  иборат  аз  роҳандозӣ  ва   рушди  ҳамкории байни палатаҳои  савдо  ва  саноат ва  сохторҳои тиҷоратии  Тоҷикистону Дубай  буд. 
Ҷонибҳо  дар  ҷараёни  суҳбати  судманд  аз  рӯи  масоили  муҳими ҳамкориҳои дуҷонибаи тиҷоратию  иқтисодӣ  табодули  афкор  намуда,  самтҳои  фаъолияти  палатаҳои  савдо  ва  саноат  ва вусъат  бахшидани ҳамкории  мутақобилан  муфиди   намояндагони сохторҳои  тиҷоратии Тоҷикистону  Дубайро  мавриди  муҳокима  қарор  доданд.
Ҳамчунин  масоили  ҷалби  сармояҳо ба бахшҳои  энергетика  ва  саноати  Тоҷикистон,  аз ҷумла,  дар  амри  бунёди  корхонаҳои  муштараки  коркарди  меваю сабзавот,  нахи  пахта ва  пашму  чарм  баррасӣ  шуданд.
Ҳасан  ал – Ҳошимӣ  дар  навбати  худ иброз  дошт,  ки  сафари  раиси  Палатаи  савдо  ва  саноати  Тоҷикистон  ба  Дубай  аз он шаҳодат  медиҳад, ки  муносибатҳои  дуҷонибаи ҳар  ду  палата   вақтҳои  наздиктарин  ба сатҳи  сифатан  нав  бардошта  мешаванд.  Вазифаи  асосии  мо  иборат  аз  расонидани  кӯмак  ва  дастгирии аҳли  тиҷорати Тоҷикистону  Дубай  ба  манзури  пайдо намудани    бозорҳои нав  ва рушди  ҳамкории  мутақобилан  муфид  аст.
Шариф  Саид  дар  анҷоми  суҳбат  барои  пазироии  самимона  изҳори  сипос  карда.  Зикр  намуд, ки  Палатаи  савдо  ва  саноати  ҶТ нияти дар шаҳри Душанбе  доир намудани намоишгоҳи байналмилалии  маҳсулоти  Дубайро  дорад.