Таҷдиди роҳ аз Душанбе то сарҳади Ӯзбекистон анҷом меёбад

Душанбе, 27.05.2014. (АМИТ «Ховар»). – Таҷдиди роҳ аз дарвозаҳои ғарбии шаҳри Душанбе то сарҳади Ӯзбекистон, ки робитаи Тоҷикистонро бо ҳамсояҳо таъмин намуда ва қитъаи асосии Роҳрави 3 дар ҳошияи Барномаи ҳамкории минтақавии иқтисодии Осиёи Марказӣ ба шумор меравад, вақтҳои наздик анҷом меёбад. Роҳрави 3 дар масофаи қариб 7 ҳазор километр аз Федератсияи Русия дар Шимол то Халиҷи Форс дар Ҷануб доман паҳн кардааст.Тавре ки аз Намояндагии доимии Бонки осиёии рушд дар Тоҷикистон хабар доданд, лоиҳаи таҷдиди ин роҳи масофааш 57 километр васеъ ва ҳамвор намудани роҳ, беҳсозии заҳбуру пулҳо ва бехатарии ҳаракатро дар назар дорад. Дар ҳошияи лоиҳа ҳамчунин навсозии инфрасохтор ва беҳдошти шароити бунгоҳи назоратии «Дӯстӣ» барои осон намудани ҳаракати мардум ва интиқоли амвол пешбинӣ шудааст.Татбиқи лоиҳаи мазкур соли 2011 оғоз ёфта, анҷоми он дар соли 2015 пешбинӣ шудааст. Бонки осиёии рушд барои иҷрои ин лоиҳа дар ҳаҷми 120 миллион доллари ИМА кӯмаки молиявии ройгон тахсис дода, ҳиссаи Ҳукумати Тоҷикистон 34 миллиону 300 ҳазор доллари ИМА – ро ташкил медиҳад.