Таҷлили Рўзи байналхалқии гуногунии биологӣ дар Душанбе

Душанбе, 21.05.2014 (АМИТ «Ховар», Фарзонаи Давлат).-Ҳамасола дар ҷаҳон рўзи 22 май ҳамчун рўзи байналхалқии гуногунии биологӣ ҷашн гирифта мешавад. Бахшида ба ин рўз дар Кумитаи кор бо занон ва оилаи назди Ҳукумати Ҷумҳурии Тоҷикистон бо ташаббуси Ташкилоти ҷамъиятии «Зан ва замин» озмуни эҷодӣ байни донишҷўдухтарони кишвар  таҳти унвони «Гуногунии биологию фарҳангии маҳали худро нигоҳ медорем!» ҷамъбаст гардид.
Дар ҷамъомади мазкур Махфират Хидирова, раиси Кумитаи кор бо занон ва оилаи назди Ҳукумати Ҷумҳурии Тоҷикистон, Муҳаббат Маҳмадалиева, роҳбари Ташкилоти Ҷамъиятии «Зан ва замин», Алибек Отамбеков, намояндаи Фонди «Кристсен» дар Тоҷикистон ва дигар масъулин иштирок ва суханрони намуданд.
Дар озмуни мазкур донишҷўдухтарони Муассисаи Маркази таълимии «Чароғи Ҳидоят», аъзои Шўрои донишҷўдухтарони макотиби олии ҷумҳурӣ ва ҷавондухтарони фаъол аз деҳоти дурдасти кишвар иштирок карда, ғолибони озмун бо туҳфаҳои хотирмон қадрдонӣ гардиданд.
Мақсад аз баргузории озмуни мазкур ҷалби ҳарчи бештари ҷавондухтарон ба нигоҳдории гуногунии биологӣ дар ҷумҳурӣ мебошад.