Тадбирҳои таъмини бехатарии ҳаракат дар роҳҳои оҳан

 Душанбе, 23.05.2014. (АМИТ «Ховар, Мавҷуда Анварӣ). — «Бехатарии ҳаракат дар роҳҳои оҳан»-таҳти чунин унвон дар раёсати Вазорати корҳои дохилӣ дар нақлиёт машварат доир гардид. 
Муовини сардори Раёсати Вазорати корҳои дохилӣ дар нақлиёт Саидҷафар Холиқов таваҷҷуҳи ҳозиринро ба баррасии рӯзномаи машварат ҷалб намуда, зикр кард, ки мавриди муҳокима қарор додани мавзӯи мазкур иқдоми саривақтӣ ва зарурӣ аст.
Нозири калони раёсат  Ш. Бозоров оид ба вазъи бехатарии ҳаракат дар роҳҳои оҳани ҷумҳурӣ дар давраи соли 2013 ва 4 моҳи соли равон гуфт: «Ҷиҳати пешгирии ҳодисаҳои нохуши нақлиёти роҳи оҳан, бояд дар ҳамбастагӣ бо кормандони КВД «Роҳи оҳани Тоҷикистон, муассисаҳои таълимӣ, аҳли ҷамоат, воситаи ахбори умум фаъолият бурда, барои вусъат додани корҳои фаҳмондадиҳию пешгирикунанда кӯшиш ба харҷ дода шавад». 
Сардори шуъбаи назорати умумии Прокуратураи нақлиётии Тоҷикистон  С. А. Қаюмзода ибрози назар намуда, ҷиҳати гузоштани дидбонгоҳҳои иловагӣ дар минтақаҳои серодам ва ба роҳ мондани наворҳои телевизионӣ нисбат ба садамаҳо ва ҳодисаҳои нохуш дар роҳи оҳан якчанд таклиф пешниҳод намуд.
Дар идомаи машварат муовини сардори раёсати Вазорати корҳои дохилӣ дар нақлиёт Саидҷафар Холиқов вобаста ба бехатарии ҳаракати қатораҳо ва таъмини амнияти шаҳрвандон дар роҳҳои оҳан ибрози андеша намуд.