Тасдиқи як силсила барномаҳои давлатӣ аз сӯи Ҳукумати кишвар

     Душанбе, 2.05.2014.(АМИТ «Ховар», Марзия Саидзода).- Ахиран дар ҷаласаи навбатии Ҳукумати Ҷумҳурии Тоҷикистон як силсила  барномаҳои давлатӣ баррасӣ ва тасдиқ шуданд. Инҳо   «Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023», «Барномаи рушди муассисаҳои томактабӣ ва миёнаи умумии хусусӣ барои солҳои 2014-2020», «Барномаи ислоҳоти (рушди) милитсия барои солҳои 2014-2020», Нақшаи чорабиниҳо оид ба беҳтар намудани нишондиҳандаҳои Ҷумҳурии Тоҷикистон дар ҳисоботи “Пешбурди соҳибкорӣ”-и Бонки ҷаҳонӣ, Нақшаи чорабиниҳо оид ба беҳтар намудани фазои сармоягузорӣ дар бахши туризм мебошанд.
       Ҳамзамон Ҳукумати ҷумҳурӣ лоиҳаи Қонуни Ҷумҳурии Тоҷикистон “Оид ба ворид намудани тағйирот ба Қонуни Ҷумҳурии Тоҷикистон “Дар бораи шартномаҳои байналмилалии Ҷумҳурии Тоҷикистон” ва ҳам хулосаи дигари Ҳукумат ба лоиҳаи Қонуни Ҷумҳурии Тоҷикистон “Дар бораи кумакҳои унвонии иҷтимоӣ”-ро маъқул дониста, онҳоро ба баррасии палатаи поёнии Парлумони мамлакат пешниҳод намуд.