ВКД: Тафтиши фаъолияти «Роҳи оҳани Тоҷикистон» асоси воқеӣ надорад

Душанбе, 21.05.2014. (АМИТ «Ховар, Мавҷуда Анварӣ). — Вазорати корҳои дохилии Ҷумҳурии Тоҷикистон вобаста ба хабарҳои дар Васоити ахбори омма ба табъ расида, ки гӯё Вазорати корҳои дохилӣ дар якҷоягӣ бо дигар вазорату идораҳо маблағҳои азхудкардаи собиқ раиси Корхонаи воҳиди давлатии «Роҳи оҳани Тоҷикистон» Амонулоҳи Ҳукуматуллоҳро таҳқиқ мекунад, чунин иттилоъ медиҳад, ки ин хабарҳо комилан нодуруст буда, асоси воқеӣ надоранд.
Аз ҷониби Вазорати корҳои дохилӣ ягон гурӯҳи махсуси муфаттишон таъсис дода нашудааст ва фаъолияти собиқ раиси Корхонаи воҳиди давлатии «Роҳи оҳани Тоҷикистон» Амонулоҳи Ҳукуматуллоҳ мавриди тафтишу таҳқиқ қарор нагирифтааст.
Дар ин бора дар сомонаи расмии Вазорати корҳои дохилӣ иттилоъ дода шудааст.