Анҷуман ташкилотҳои ҷавонони Тоҷикистонро ба ҳам овард

 
Душанбе, 16.06.2014.(АМИТ «Ховар», Зарангези Латиф).-Дар  Анҷумани VII-уми ташкилотҳои ҷавонони Тоҷикистон, ки бо ташаббуси   Кумитаи ҷавонон, варзиш ва сайёҳӣ,  Хазинаи кӯдакони СММ (ХК СММ), Иттиҳодияи ташкилотҳои ҷавонони Тоҷикистон (ИТҶТ) ва Ассотсиатсияи миллии волонтёрони Тоҷикистон (АМВТ) доир гардид, зиёда аз 150  нафар фаъолҷавонон аз ҳисоби роҳбарони ташкилотҳои кор бо ҷавонон ва аъзои ИТҶТ,  волонтёрони АМВТ, намояндагиҳо  аз дастгоҳи Президенти Ҷумҳурӣ, Маҷлиси намояндагони Маҷлиси Олии Ҷумҳурии Тоҷикистон, ниҳодҳои кор бо ҷавонон, варзиш ва сайёҳӣ, кор бо занон, шарикони иҷтимоӣ, расонаҳои хабарӣ ва меҳмонони дигар ширкат  варзиданд.
Дар рӯзи саввуми анҷуман раҳбарони як силсила ташкилотҳои  ҷамъиятӣ, минҷумла Ташкилоти ҷамъиятии “Шото”, “Ташаббусҳои  ҷавонони Тоҷикистон”, “Сайёр, “Ваҳдати ҷавонон” ва “Занони Шарқ” роҷеъ ба дастовардҳо ва натиҷаи татбиқи лоиҳаҳое, ки дар доираи «Барномаи миллии рушди ҷавонони Тоҷикистон» дастгирӣ ёфтаанд, сухан гуфтанд. 
Дар доираи анҷуман ҳамчунин намоиши дастовардҳои ташкилотҳои кор бо ҷавонон  созмон дода шуд.  
 
Ёдрас мекунем, ки аз 11-ум  то 14-уми июни соли ҷорӣ дар урдугоҳи «Шоҳин»-и шаҳри Қайроққуми вилояти Суғд Анҷумани VII-уми ташкилотҳои ҷавонони Тоҷикистон сурат гирифт.