Анҷумани созмонҳои ҷавонон дарҳояшро боз мекунад

Душанбе, 10.06.2014. (АМИТ «Ховар», Лайло  Тоирӣ). – Кумитаи ҷавонон,  варзиш ва  сайёҳии  назди Ҳукумати  ҶТ якҷоя бо  Хазинаи ҷавонии  кӯдакони СММ ва Иттиҳодияи  миллии  ихтиёриёни  Тоҷикистон  аз  11  то 14  июн  дар  шаҳри  Қайроқуми  вилояти  Суғд Анҷумани  созмонҳои  ҷавонони Тоҷикистонро  доир  менамояд.
Тавре  ки  аз маркази  матбуоти  кумита  хабар  доданд,  дар  анҷуман  130  нафар  вакилон  аз ҷумлаи  роҳбарону аъзои Иттиҳодияи  миллии   ихтиёриён,  намояндагони  ҷавонони  фаъол,  сиёсатмадорон, аъзои маъмурияти Президент, вакилони палатаи  поёнии  Маҷлиси   Олии  ҶТ,  намояндагони  муассисаҳои умури  ҷавонон,  занон,  васоити  ахбори омма,  ходимони  ҷамъиятӣ ва  коршиносон  иштирок  менамоянд.
Дар  ҳошияи  анҷуман  машварату иҷлосияҳои  махсус  дар  мавзӯи  таълими   духтарон, ташаккули  низоми рушди ҷунбиши ихтиёриёни Тоҷикистон,  таҳкими  нерӯи  созмонҳои  ҷавонон  баргузор мешаванд.
Мақсад  аз  анҷуман водор  намудани созмонҳои  ҷавонон  ба  мусоидат ва  иштироки  фаъолонаи  ҷавонон  дар  демократикунонии ҷомеа, ташаккулу таҳкими  заминаи  меъёрию  ҳуқуқии ҷунбишҳои  ихтиёриён ва  ғайра мебошад.