Боздиди донишҷӯёни Коллеҷи шоҳигарӣ аз Тоҷикистон

Душанбе, 11.06.2014. (АМИТ «Ховар», Пайрави Косим). – Гурӯҳи иборат аз 8 нафар афсарони Британия ва 9 нафар афсарони калони байналмилалии созмонҳои мухталифи ҳарбии Коллеҷи шоҳигарии тадқиқоти мудофиавии Британияи Кабир аз 11 то 14 июн аз Тоҷикистон боздид менамояд. Назар ба хабари мутахассиси бахши робита бо аҳли ҷамъияти Сафорати Британияи Кабир дар Тоҷикистон Хосият Амидхонова, сафари афсарон ҷузъи таълимоти Коллеҷи шоҳигарии тадқиқоти мудофиавӣ ба шумор меравад. Сафари афсарон ба Тоҷикистон дар асоси Ёддошти мутобиқшуда дар бораи ҳусни тафоҳум дар бахши ҳамкории мудофиавии миёни Шоҳигарии Муттаҳида ва Ҷумҳурии Тоҷикистон сурат мегирад. Гурӯҳи Коллеҷи шоҳигарии тадқиқоти мудофиавии Британияи Кабир дар ҳошияи барномам сафараш бо созмонҳои ҳукуматию ғайриҳукуматӣ аз қабили Вазорати мудофиа, Вазорати корҳои хориҷии Ҷумҳурии Тоҷикистон, Созмони рушди Оғохон ва Созмони амнияту ҳамкорӣ дар Аврупо якчанд мулоқот анҷом медиҳад. Ҷонибҳо дар ҷараёни мулоқотҳо масоили сиёсӣ, молиявӣ, иҷтимоӣ ва ҳуқуқию иқтисодии Тоҷикистону минтақаро мавриди муҳокима қарор медиҳанд.