Боздошти «ESSE»-ҳои беаксиз

Душанбе,13.06.2014. (АМИТ «Ховар», Лайло Тоирӣ).- Кормандони шуъбаи мубориза бо коррупсия ва ҷиноятҳои иқтисодии хусусияти коррупсионидоштаи Раёсати Агентии назорати давлатии молиявӣ ва муборриза бо коррупсияи Ҷумҳурии Тоҷикистон дар шаҳри Душанбе дар асоси санади харидории озмоишӣ дар назди КВД «Бозори Корвон»-и ноҳияи Фирдавсии шаҳри Душанбе, ба воситаи харидори шартӣ шаҳрванд Мирзоев Комил Шарипович аз таҳвилкунандаи мол Бозоров Сироҷидин Асламхонович ба миқдори 11 ҳазору 500 дона дар 15 қуттӣ тамокуҳои тамғаношудаи «ESSE», ба маблағи умумии 8 ҳазору 600 долари амрикоӣ ва 184 сомонӣ харидорӣ карда шуд. Тавре аз Агентии мазкур ба АМИТ «Ховар» иттилоъ доданд, номбурда ин миқдор молу масҳулотро дар асоси маслиҳати пешакӣ бо шаҳрванд Насиров Раҳматҷон Низомидинович ғайриқонунӣ ба даст оварда, бо мақсади минбаъд бе ягон маркаи боҷи аксизӣ ба муомилот бароварда, мувофиқи маълумотномаи КВД «Бозори Шоҳмансур»-и шаҳри Душанбе ин миқдор тамокуҳои тамғаношуда дар маҷмӯъ 57500 сомониро ташкил медиҳад. Ҳангоми гузаронидани чорабиниҳои оперативӣ-ҷустуҷӯӣ Бозоров Сироҷидин Асламхонович ва Насиров Раҳматҷон Низомидинович дар рафти хариду фурӯш дастгир гардида, нисбат ба онҳо парвандаи ҷиноятӣ бо аломатҳои моддаи 259, қисми 2, банди «а»-и Кодекси ҷиноии Ҷумҳурии Тоҷикистон оғоз карда шуда, тафтишоти пешакӣ идома дорад.