Боздошти нашъаҷалоб дар шимоли мамлакат

Душанбе, 26.06.2014. (АМИТ «Ховар», Муқаддас Темурзода).-Шабонарӯзи сипаригардида кормандони Раёсати Агентии назорати маводи нашъаовари назди Президенти ҶТ дар вилояти Суғд як ҳодисаи гардиши ғайриқонунии маводи мухадирро ошкор намуданд.
Тавре ки маркази матбуоти АНМН хабар медиҳад, дар шаҳри Хуҷанд сокини 37-солаи маҳаллӣ дастгир шуд, ки кормандони фаврӣ аз ӯ халтаи полиэтилениро бо ҳашиш мусодира намуданд.
Рӯзи дигар дар хонаи дастгиршуда кофтуков гузаронида шуд. Ҳангоми кофтуков аз дохили қубури обгузари ҳуҷраи ташноб махфигоҳ ошкор гардид, ки дар дохили он маводи нашъаовар пинҳон буд.
Мутобиқи хулосаи ташхис маводи нашъаовари ошкоршуда наздики 3 кг ҳашиш ва ҳероин мебошад.
Аз рӯи ҳодисаи мазкур парвандаи ҷиноӣ оғоз гардида, тафтиш идома дорад.