Чеварони тоҷик бо усули «3G Tailor» шинос мегарданд

Душанбе, 12.06.2014.(АМИТ «Ховар», Марзия Саидзода).-Беш аз 20 тренер ва корбарони мошинаҳои дӯзандагии ширкатҳои дӯзандагии Тоҷикистон бо усули нодиру муосири омӯзишии “3G Tailor” аз ироагари маъруфи хадамоти машваратӣ дар саноати дӯзандагӣ дар Осиё — «Rajesh Bheda Consulting», шинос мешаванд. Ин усул замони омӯзишро то ба 75% коҳиш дода, самаранокии кори коромӯзонро беҳтар месозад. Давраи омӯзишии “Тамрини мураббӣ” (“Train the Trainer”) бо усули “3G Tailor” имрӯз, 12-уми июн дар шаҳри Хуҷанд оғоз шуд ва дар доираи он тренерони оянда аз коршиноси ширкати «Rajesh Bheda Consulting» Пол Колйер омӯзиш мегиранд. Пол Колйер таҷрибаи беш аз 40 соли кор дар саноати дӯзандагиро дорад. Намояндагони ширкатҳои дӯзандагии Тоҷикистон назири “Дилором”, “Лидер”, “Ноҳид”, “Ресандаи Қӯрғонтеппа”, “Фирӯз” ва “Текстил Ситӣ” дар ин давраи омӯзишӣ ҳузур доранд. Ин давраи омӯзишӣ дар доираи лоиҳаи Маркази тиҷорати байналмилалӣ /МТБ/ таҳти унвони “Тақвияти рақобатпазирии содиротии корхонаҳои соҳаи нассоҷиву дӯзандагӣ ва рушди тавоноии ниҳодҳои пуштибони тиҷорат дар Тоҷикистон” баргузор мегардад. Яке аз мушкилоти асосие, ки корхонаҳои нассоҷӣ ва дӯзандагии Тоҷикистон рӯбарӯ мешаванд, камбуди мутахассисон, хусусан дӯзандагони моҳиру ҳирфаист ва бинобар сабабҳои молӣ наметавонанд кормандони навро омӯзиши кофӣ диҳанд. Раҷеш Бҳеда, мушовири байналмилалии МТБ доир ба мудирияти сифат ва маҳсулнокӣ ва мудири иҷроияи ширкати консалтингии “«Rajesh Bheda Consulting», мегӯяд, давраи омӯзишии “3G Tailor” бо ҳадафи талоше ҷиҳати рафъи ин мушкил баргузор мегардад. Мавсуф афзуд, ки ҳадафи ин усул омода кардани мутахассисонест, ки дар тӯли камтар аз як ҳафта дигаронро омӯзиш дода тавонанд, ки чӣ гуна аз таҷҳизоти навтарин истифода бояд бурд. Ин усул дар корхонаҳои пешрафтаи дӯзандагии Бритониёи Кабир, Чин, Ҳиндустон ва Шри-Ланка натиҷаҳои назаррас додаст. Иштирокдорони давраи омӯзишӣ бо асосҳои омӯзонидани калонсолон, муоширати муассир ва маҳорати тренерӣ шинос мешаванд. Наворҳои видеоии таҷрибаҳои беҳтарини ҷаҳонӣ барои таҳлили усулҳои тренерӣ ва таҳияи барномаҳои омӯзишӣ ҳамзамон намоиш дода мешавад.