Дарёфти беш аз 19 кг героин аз донишҷӯ

Душанбе, 30.06.2014. (АМИТ «Ховар», Муқаддас Темурзода).-Ҳангоми гузаронидани чораҳои фаврӣ-ҷустуҷӯӣ кормандони милитсия дар маҳаллаи 34-уми шаҳри Хуҷанд шаҳрванд Марҳамов Фариддун Суфибекович, соли таваллудаш 1986, сокини ноҳияи Мастчоҳро бо гумони ғайриқонунӣ нигоҳ доштани маводи нашъадор дастгир намуданд. Дар вақти кофтукови шахсӣ аз дохили борхалтааш маводи нашъадори ҳашиш, вазнаш 5 кг 825 грамм дарёфт ва мусодира гардид.Хамин тариқ, бо гумони ғайриқонунӣ нигоҳ доштани маводи нашъадор, зимни гузаронидани боз як амалиёти махсус кормандони милитсия шаҳрванд Шарифов Умарҷон Файзуллоевич, соли таваллудаш 1994, донишҷӯи Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷандро дастгир намуданд. Ҳангоми азназаргузаронии хонаи истиқоматиаш аз дохили ҷевон маводи сахттаъсири героин, вазнаш 19 кг 230-грамм дарёфт ва мусодира гардид.Аз рӯи ин ҳодисаҳо парвандаи ҷиноӣ оғоз гардида, тафтиш идома дорад.