Дилшод Назаров — ғолиби “Даъвати Маскав»
Душанбе, 12.06.2014. (АМИТ “Ховар”, Ситораи Боймурод).-Дилшод Назаров, варзишгари машҳури тоҷик дар мусобиқаи байналмилалии варзиши сабук “Даъвати Маскав” дар сабқати гурзандозӣ ғолиб шуд. Ба иттилои Кумитаи миллии олимпӣ мусобиқа дар Маскав баргузор гашта, 12 нафар варзишгар ширкат намуд. Дилшод Назаров ба гирифтани мақоми аввал сазовор гашта, ҷойи дуввумро Павел Кривитский аз Беларус, ҷои сеюмро бошад, Денис Лукянови русиягӣ сазовор шуданд.Ёдовар мешавем, Дилшод Назаров моҳи май дар мусобиқаи байналмилалӣ оид ба гурзандозӣ дар Олмон мақоми дувумро касб карда буд. Ин мусобиқа, ки 17-уми май дар шаҳри Ҳаллеши Олмон баргузор шуд, барояш дар мавсими имсола аввалин буд. Дилшод Назаров гурзро ба масофаи 79 метру 58 сантиметр ҳаво дод, ки ин нисбат ба ғолиби мусобиқа Павел Файдек аз Лаҳистон ҳамагӣ 9 сантиметр камтар аст.