Дипломи “Россотрудничество” ба А. Раҳмонов

 
Душанбе,07.06.2014. (АМИТ «Ховар», Раъно Нусратуллозода).-Дирӯз роҳбари намояндагии “Россотрудничество” дар Тоҷикистон Владислав Курнушко ба Донишгоҳи давлатии омӯзгории Тоҷикистон  ба номи С.Айнӣ ташриф оварда, бо ректори он Абдуҷаббор Раҳмонов мулоқот намуд.
Тибқи иттилои котиби матбуоти донишгоҳи мазкур  Бахтиёри Абдураҳим дар оғози вохӯрӣ, ки бо ҳузури васеи роҳбарони сохторҳои донишгоҳ баргузор гардид, А.Раҳмонов равобити мутақобилан судманди таълимгоҳро бо “Россотрудничество” ситоиш карда, изҳор дошт, ки ин ташкилот барои омӯзиши густурдаи забони русӣ дар донишгоҳ иқдомоти наҷибу манфиатборро амалӣ намудааст.
Ректор аз фаъолияти Маркази русӣ ва ифтитоҳи Маркази забон, фарҳанг ва таърихи рус, ки чанде қабл таъсис ёфта буд, ёдовар шуда, онҳоро намунаи барҷастаи натиҷаи ҳамкориҳо унвон кард.
Дар такя бар қавли А.Раҳмонов, айни замон марказҳои мазкур бо технологияҳои навтарин муҷаҳҳаз буда, барои густариши забони русӣ заминаҳои мусоид фароҳам меоваранд. Хоҳишмандон бемамониат аз технологияи омӯзишии марказ ба таври ҳамешагӣ истифода менамоянд.
Роҳбари намояндагии “Россотрудничество” дар Тоҷикистон Владислав Курнушко низ ҳамкориҳои дуҷонибаро дар пояи баланд арзёбӣ карда, саҳми ректор А.Раҳмоновро дар ин самт назаррас ва шоистаи таҳсин унвон намуд. Ба ақидаи мавсуф, дар таъсис ва фаъолияи Маркази русӣ, на танҳо дар Донишгоҳи омӯзгорӣ, балки дар кулли манотиқи Тоҷикистон А.Раҳмонов нақши арзанда дорад. Бинобар ин, роҳбарияти олии Оҷонсии федеролии Русия “Россотрудничество” тасмим гирифт, ки дар Рӯзи забони русӣ ва Рӯзи шоири бузург Пушкин ба хотири таҳким, тарғиб ва густариши забони русӣ А.Раҳмонов бо дипломи махсуси ин ташкилот қадрдонӣ гардад.
Сипас, дар ҳузури ширкатдорон ва дар фазои тантанавӣ Владислав Курнушко дипломро ба Абдуҷаббор Раҳмонов тақдим намуд.