“Хатлон — зидди маводи нашъаовар”

Душанбе, 16.06.2014. (АМИТ «Ховар», Мавҷуда Анварӣ).-   Аз 1 то 26 июни соли 2014 дар вилояти Хатлон  чорабиниҳои мухталифи зиддимухаддиротӣ гузаронида мешаванд, ки ба 26 июн — Рӯзи байналмиллалии мубориза бар зидди сӯйистеъмоли маводи нашъаовар ва муомилоти ғайриқонунии он бахшида шудаанд. Ин чорабиниҳо аз тарафи раёсати Агентии назорати маводи нашъаовари назди Президенти ҶТ дар вилояти Хатлон дар якҷоягӣ бо намояндагони ҳокимияти иҷроияи маҳаллии ноҳияҳо ва шаҳрҳои вилоят, инчунин бо иштироки созмонҳои ҷавонон ва ихтиёрӣ доир мегарданд.
Дар китобхонаҳои ноҳияҳо ва шаҳрҳои вилоят намоиши тасвираҳои ҷавонони вилояти Хатлон ташкил шуд, ки дар доираи озмуни ҳарсолаи “Хатлон — зидди маводи нашъаовар” омода  шудаанд.
Дар ҳудуди вилоят мусобиқаҳои варзишии  футбол, волейбол, тенниси рӯимизӣ зери шиори “Варзиш- зидди маводи нашъаовар” гузаронида мешаванд.
Чорабиниҳо  бо мақсади ташаккули ҷаҳонбинии зиддимухаддиротии ҷавонон ва наврасон, тарғиби тарзи ҳаёти солим, машғул шудан ба варзиш ташкил гардидаанд.