Хуҷанд: содироти маҳсулоти 17 коргоҳ ба хориҷа

Душанбе, 24.06.2014. (АМИТ «Ховар», Абдуаҳад Шарифзода).-Дар шаҳри Хуҷанди вилояти Суғд дар радифи афзудани шумораи коргоҳҳо, инчунин шумораи коргоҳҳои маҳсулоташон содиротӣ низ зиёд мешавад. Тавре ки аз мақомоти иҷроияи шаҳри Хуҷанд иттилоъ доданд, аз аввали соли равон  дар шаҳри Хуҷанд  7  коргоҳ бо 680 ҷои кор таъсис дода шуда, бо ифтитоҳи онон алъон шумораи коргоҳҳо дар маркази вилоят ба 92 адад расидааст.   
Дар ҷамъбасти 5 моҳи аввали соли ҷорӣ коргоҳҳои шаҳри Хуҷанд ба маблағи 190 млн. сомонӣ маҳсулот истеҳсол кардаанд.  
Дар айни замон  масолеҳҳои истеҳсолшавандаи  17 коргоҳи шаҳр  ба мамолики хориҷи  кишвар, аз ҷумла ба ИДМ,  Аврупо ва Осиё  содирот мешаванд. 
Дар маҷмӯъ, то интиҳои соли равон мувофиқ ба нақша дар шаҳри Хуҷанд ба истифода додани 20 коргоҳи нав пешбинӣ шудааст.