Исфара: варзишгоҳ барои 16 ҳазор нафар

Душанбе, 20.06.2014. (АМИТ «Ховар», Зарангези Латиф).-Дар ҷамоати деҳоти Чилгазии шаҳри Исфара ба тариқи ҳашар варзишгоҳ бо 4 ҳазор ҷои нишаст бунёд мешавад, ки арзиши лоиҳавии он 1,5 миллион сомониро ташкил мекунад.
Ба иттилои хадамоти матбуоти раиси вилояти Суғд, то ин дам дар ҷамоат варзишгоҳе, ки дар он чорабиниҳои оммавӣ бо теъдоди зиёди одамон гузаронида шаванд, вуҷуд надошт.
Бояд гуфт, ки бо мусоидати мақомоти иҷроияи ҳокимияти давлатии шаҳри Исфара барои сохтмони варзишгоҳ 2, 32 га замин ҷудо шудааст ва дар айни ҳол корҳои созандагӣ идома доранд.
Гуфта мешавад, ки ҷамоати деҳоти Чилгазӣ аз 18 маҳалла иборат буда, дар он наздик ба 16 ҳазор нафар аҳолӣ истиқомат мекунад.