Иштироки ҳунармандони тоҷик дар фестивали Кувейт

Душанбе, 17.06.2014 (АМИТ «Ховар»).- Аз 17 то 22 июни соли равон дар кишвари Кувейт 17-умин фестивали  байналмилалии мусиқӣ   баргузор мегардад, ки дар он ҳунармандони тоҷик -ансамбли рақсии «Зебо», ансамбли созҳои миллии Филармонияи давлатии ба номи А.Ҷӯраев бо роҳбарии Шариф Бедаков ҳунарнамоӣ менамоянд. 
Барномаи консертии ҳунармандони тоҷик  аз суруду рақс ва оҳангҳои  халқии  тоҷикӣ иборат аст. Ҳамзамон дар ифтитоҳи  барномаи консертӣ намоиши суратҳои  Шуҳратҷон Ёров  таҳти унвони «Тоҷикистони  озоди ман» , аксҳо аз ёдгориҳои таърихӣ, манзараҳои дилошӯби кишвар, урфу одат ва ҳунарҳои миллӣ ба маърази тамошо гузошта мешаванд. Қобили зикр аст, ки иштироки ҳунармандони тоҷик бо ибтикори  сафорати Чумҳурии Тоҷикистон дар Кувейт   роҳандозӣ гардид. Зимни суҳбат  Сафири Фавқулода ва Мухтори Ҷумҳурии  Тоҷикистон дар кишвари Кувейт  Зубайдулло Зубайдов иброз намуд, ки  муносибатҳои  дипломатии Тоҷикистон ва Кувейт  рўз  то рўз  густариш ёфта,  баҳри таҳкими робитаҳои иқтисодӣ, сиёсӣ ва фарҳангии  ду кишвар заминаҳои боэътимод  мегузоранд.