Иштироки Тоҷикистон дар ҳафтаи агросаноатии Белоруссия

Душанбе, 03.06.2014 (АМИТ «Ховар», Пайрави Қосим).- Ҳайати Тоҷикистон таҳти роҳбарии муовини вазири кишоварзии Ҷумҳурии Тоҷикистон Зеваршо Зеваршоев барои иштирок дар ҳафтаи агросаноатии Белоруссия, ки аз 3 то 8 июн баргузор мегардад, ба Белоруссия сафар намуд. 
Тавре аз Сафорати Белоруссия дар Тоҷикистон иттилоъ доданд, дар нақша аст, ки ҳайат ба намоишгоҳи махсуси байналмилалии «Белагро-2014» ташриф оварда, бо фаъолияти корхонаҳои асосии Белоруссия оид ба истеҳсоли техникаи хоҷагии қишлоқ — ҶСШК «Заводи трактори Минск», ИИ «Гомсельмаш», ҶСШК «Бобруйскагромаш», ҶСШК «Заводи деталҳои трактор ва агрегатҳои Бобруй» шинос мегарданд. Ғайр аз ин, ҳайат ба ташкилоти кишоварзии ноҳияи Несвирж ташриф меорад.