Изҳороти ВКД оид ба ҷамъомади назди Сафоратхонаи Британияи Кабир

Душанбе, 24.06.2014. (АМИТ «Ховар», Муқаддас Темурзода). — Дар ҳодисае, ки дар назди Сафоратхонаи Британияи Кабир дар Ҷумҳурии Тоҷикистон 10 июни соли равон соати 16:00 ба вуқӯъ пайваста, 30 дақиқа идома ёфтааст, тахминан 45-50 нафар шаҳрванд дар назди сафоратхонаи мазкур, воқеъ дар кӯчаи Мирзо Турсунзода, хонаи 67, ҷамъ омада, изҳори вохӯрӣ бо Сафири Британияи Кабир дар Ҷумҳурии Тоҷикистонро кардаанд.
Ҳангоми дастрас шудани онҳо аз ҷониби кормандони милитсия ба РВКД дар шаҳри Душанбе маълум гардид, ки шаҳрвандони мазкур баъди хабардор шудани он, ки Сафири Британияи Кабир дар Ҷумҳурии Тоҷикистон ба шаҳри Хоруғи ВМКБ сафар кардааст, аз намояндагони сафоратхона талаб намудаанд, ки сафир аз ВМКБ баргашта, бо онҳо суҳбат кунад, зеро ки сар задани нооромиҳо дар шаҳри Хоруғи Вилояти Мухтори Кӯҳистони Бадахшонро аз хориҷиҳо гумонбар шудаанд.
Гарчанде аз тарафи Сафоратхонаи Британияи Кабир дар Ҷумҳурии Тоҷикистон арзу шикоят ворид нашуда бошад, ҳам аз ҷониби мақомоти корҳои дохилӣ сари вақт барои роҳ надодан ба бетартибиҳо тадбирҳо андешида шуда, амнияти сафоратхонаи мазкур зери назорати қатъӣ гирифта шуд.
 Нисбат ба 5 нафар шаҳрванде. ки дар назди Сафоратхонаи Британияи Кабир ҷамъ шуда буд, протоколи ҳуқуқвайронкунии маъмурӣ бо моддаи 461 Кодекси ҳуқуқвайронкунии маъмурии Ҷумҳурии Тоҷикистон тартиб дода шуда, аз онҳо аз тарафи Суди ноҳияи Сино ҷарима ситонида шуд.
Инчунин нисбат ба 15 нафар иштирокчӣ протоколҳои ҳуқуқвайронкунии маъмурӣ аз рӯи Кодекси ҳуқуқвайронкунии маъмурӣ тартиб дода шуда, ҷиҳати дар оянда такрор накардани чунин ҳуқуқвайронкуниҳо қатъиян огоҳонида шуда ва бо 27 нафар суҳбати инфиродӣ-пешгирикунанда барои роҳ надодан ба чунин бетартибиҳо гузаронида шуд.
Баъди ба вуқӯъ пайвастани ин ҳодиса барои дуруст санҷидани ҳодисаи мазкур муовини вазири корҳои дохилӣ И. И. Умарзода ба Сафорати Британияи Кабир рафт. Дар вақти суҳбат бо кормандони сафорат ва Сафири Британияи Кабир маълум шуд, ки ба сафорат ва кормандони сафорат ягон зарари моддӣ ва маънавӣ расонида нашудааст ва кормандони сафорат аз корҳои ба анҷом расонидаи кормандони ҳифзи ҳуқуқ изҳори миннатдорӣ намуда, ба ҳаракатҳои кормандони милитсия баҳои баланд доданд.
Дар ин бора ВКД ҶТ хабар медиҳад.