Кӯлоб: омӯзиши таҷрибаи пешқадам

Кӯлоб, 19.06.2014. (АМИТ «Ховар»,  Сулаймони Хол).-Бо мақсади таъмини амнияти озуқавории кишвар кишоварзони ноҳияи Кӯлоб аз ҳамаи роҳу усулҳои муосир истифода намуда, кӯшиш доранд, ки ҳарчи бештар маҳсулоти хушсифати маҳаллӣ истеҳсол намоянд. Деҳқонони ноҳия дар заминҳои корами обӣ кишти сабзавоти барвақтиро васеъ намуда, бо ҷалби мутахассисони соҳа тухмиҳои хушсифат ва нуриҳои органикию захрхои зидди ҳашаротро истифода менамоянд. Дар ҷамоати деҳоти Кӯлоб соли ҷорӣ дар майдони 209 гектар сабзавот кишт шуд ва ҳокимияти маҳаллӣ деҳқонони дигар ҷамоатҳоро баҳри таҷрибаи бештар аз худ намудан ба ин ҷамоат даъват карда, семинари омӯзишӣ гузаронид. Мутахассисон ва деҳқонони варзида гузаронидани қоидаҳои агротехникӣ, истифодаи усули биологии мубориза бар зидди ҳашароти зараррасонро ба кишоварзон омӯзониданд. 
Имсол кишоварзони ноҳия дар 907 гектар кишти сабзавот гузарониданд, ки нисбат ба соли гузашта 119 гектар зиёд мебошад.