Лағви 8 қарори судҳо дар бораи ихроҷи шаҳрвандони ҶТ

Душанбе, 09.06.2014. (АМИТ «Ховар», Лайло Тоирӣ). —  Моҳи  майи  соли  ҷорӣ суди  болоӣ 8  қарори  судҳои ноҳиявии минтақаи Маскавро  дар  бораи  ихроҷи маъмурии  шаҳрвандони  Тоҷикистон  бекор  намуд. Дар  ин  бора котиби  матбуоти  Намояндагии Вазорати  меҳнат,  муҳоҷират  ва  шуғли  аҳолии  ҶТ  дар  ФР  оид ба  муҳоҷират  Иброҳим  Аҳмадов  хабар  медиҳад. 
Ҳуқуқшиносони намояндагӣ  дар  асоси  аризаҳои  шаҳрвандон шикоятномаҳоро  таҳия  ва  ба  суди  шаҳри  Маскав  ирсол  намуданд. Суди  шаҳри  Маскав бо  назардошти ҳуҷҷатҳои пешниҳодшуда дар  мавриди  будубош ва  фаъолияти меҳнатии муҳоҷирон  қарори шаш  суди  ноҳиявии  пойтахтро  дар  бораи  ихроҷи  шаҳрвандон  бекор  намуд.  
Суди  вилояти Маскав боз ду  ҳамин  хел шикоятномаро баррасӣ  карда, ба таври  қаноатбахш ҳал намуд.
Дар  робита бо  ин,   намояндагӣ  муҳоҷирони  меҳнатӣ —  шаҳрвандони  Тоҷикистонро  бори  дигар даъват  менамояд, ки меъёрҳои  қонунии  бахши  муҳоҷиратро  қатъиян  риоя  карда,  сари  вақт  ба  қайди  муҳоҷиратӣ дароянд, ҳуҷҷатҳоеро, ки  иҷозати  фаъолияти  меҳнатиро  медиҳанд, ба  расмият   дароранд.
Мувофиқи  суханони Иброҳим  Аҳмадов, баъзан  ҳамватанони  мо фақат бо  пешниҳоди иҷозатнома  фармоишоти  шахсони ҳуқуқиро баҷо  меоранд. Дар  чунин  мавридҳо   шаҳрвандони  зикршуда қонуншикан  дониста, аз  рӯи   моддаи  18 Кодекс дар  бораи ҳуқуқвайронкунии  маъмурии  Федератсияи  Русия  ба  ҷавобгарии  маъмурӣ  кашида  мешаванд. 
Дар  шаҳрҳои  Маскав,  Санкт — Петербург ва  вилоятҳои  Маскаву  Ленинград ҳатто  дар  сурати бори  аввал  рух додани  ҳодисаи  ҳуқуқвайронкунии  маъмурӣ  қонуни  федералӣ ихроҷи  маъмурӣ ва дар  ҳаҷми  5  ҳазор  рубл  ситонидани  ҷаримаро  пешбинӣ  менамояд.